NAGPAABOT sa ilang dakong pasalamat ang mga Municipal Nutrition Action Officer (MNAOs) sa pahalipay nga gihatag sa Kapitolyo Probinsyal sa liderato ni Governor Bambi Emano.

Mokabat 13 ka munisipyo ang nakadawat sa pasidungog ug pahalipay nga tag P10,000 tungod sa pagsunod sa tulo ka tuig gikan 2017 hangtud 2019 nga namintinar ang pagkunhod sa prevalence of stunting .

Mismong ang buhatan sa Provincial Health Office-Nutrition Division sa pagpangulo ni Ms. Marites Gomez ang mihatod sa maong pahalipay ngadto sa 13 ka lungsod nga gilangkuban sa lungsod sa Claveria; Balingoan; Sugbongcogon; Salay; Lagonglong; Alubijid; Kinoguitan; Naawan; Opol; Binuangan; Tagoloan; Balingasag ug Villanueva.

Ang MNAOs sa lungsod sa Kinoguitan nga mao si Cecilia Acero nagpadangat sa iyang dakong kalipay.
Sumala niini wala kini nila damha ug sa tanan usab nga mga MNAOs nga usa ang ilang munisipyo nga mahatagan ug pahalipay ug pasidungog.

Malipayon sila nga gumikan niining pasidungog nakahatag kanila ug dugang kaikag nga buhaton pa nila ang ilang tagsa tagsang tahas nahisubay sa ilang gipanumpaan nga buluhaton.

Naghatag kini og kumpyansa kanila nga makab-ot gihapon ang pagkunhod sa malnutrisyon sa mga bata sa ilang lungsod pinaagi sa ilang pagpaningkamot inubanan sa walay puas nga pagsuporta sa lalawigan sa Misamis Oriental.

Ang pasidungog ug pahalipay nga gihatag sa kagamhanan sa probinsya ngadto sa 13 ka lungsod unta magsilbing inspirasyon aron ang uban pang lungsod maningkamot nga mabatokan ang malnutrisyon sa ilang tagsa-tagsa ka munisipyo gumikan nag-inusara lamang ang pamunoan ni Governor Bambi Emano nga molantaw ug mohatag bili sa paningkamot sa mga MNAOs ug BNS sa lalawigan.