Mi-stand out na usab ang Misamis Oriental sa hisgotanang pangkinaiyahang paningkamot. Pamatuod niini ang bag-ohay pa lang gipahigayong 2019 7th Para el MAR: Marine Protected Area Awards & Recognition niadtong Oktubre 21-23, 2019 sa University of the Philippines, Quezon City. Sa maong awards, giila ang duha ka National Finalists gikan sa Misamis Oriental isip 2019 Outstanding Marine Protected Area Networks.

Migula isip Champion ang Misamis Oriental-Gingoog Bay Alliance (GBA) nga girepresentahan ni Mayor Rommel Maslog sa Talisayan, Misamis Oriental; ug 1st Runner-up usab ang Misamis Oriental Macajalar Bay Development Alliance (MBDA) nga girepresentahan ni Mayor Diosdado Obsioma sa lungsod sa Laguindingan kauban si Ms. Kristine Galarrita ubos sa 2019 Outstanding Marine Protected Area Networks (MCPANS) Category.

Ug nahimong 2nd Runner-up ang KAHIL ICAMC sa Negros Occidental.
Tumong niining matag human sa duha ka tuig nga kalihukan kon biennial event, nga mapakita ang labing maayong pagdumala sa mga Marine Protected Areas (MPA) sa tibuok nasud sa Pilipinas ug paghatag oportunidad alang sa mga tigpasiugda niini hilabina mga lideres nga makakat-on gikan sa nagkalain-laing kasinatian.

Nagpadangat ug pahalipay si Gobernador Bambi Emano sa Misamis Oriental Department Heads Association (MODHA) hilabina sa buhatan sa Provincial Environment & Natural Resources pinanguluhan ni Engr. Prisco Valmoria, tungod kay nagbunga ang tanang paningkamot sa pag-preserba ug pag-protekta sa coastal areas ug marine resources dinhi sa lalawigan.

Katimbayayong sa NGO-Marine Conservation in the Philippines ang pangagamhanang lokal sa Misamis Oriental kung hisgutan na ang dedikasyon sa pagpanalipod sa mga kahinguhaan sa baybayon sa Pilipinas pinaagi sa Information Education Campaigns, boluntaryo gikan mismo sa kinabag-an, ug makanunayong panukiduki kon research kung unsang matang sa environmental protection nga gikinahanglan dinhi sa lalawigan.

Matud ni Gobernador Bambi Emano, ang kinaiyahan kinabuhi sa tanang binuhat nga angay ampingan, protektahan batok sa pang-abuso, ug hataga’g bili aron kinabuhi mo ug kinabuhi ko mahimong luwas gikan sa kadaot.