MIKABAT na sa 33 ka overseas Filipino workers (OFWs) ang nakapauli na sa ilang tagsa-tagsa ka pamilya sa Misamis Oriental human ma-stranded sa Luzon tungod sa lockdown sulod sa duha ka bulan.
Una nga batch ang 21 nga nakapauli niadtong Mayo 19, 2020. Ikaduha nga batch ang 12 ka OFWs nakig-uban na sa ilang minahal sa kinabuhi dinhi sa lalawigan niadtong Mayo 21, 2020. Tanan sila sakay sa sweeper trip sa barko nga midunggo sa Cagayan de Oro port sa Macabalan.
Gisiguro sa Bambi Welfare Program sa kapitolyo probinsiyal nga miagi sa hustong medical protocols ang nasangpit nga OFWs, kinsa nag-negatibo sa impeksiyon sa COVID-19 sa wala pa sila mitunob sa pantalan.
Matud pa ni Provincial Task Force for COVID-19 spokesperson Atty. Jeffrey Saclot nahimo kining posible sa koordinasyon sa Overseas Workers Welfare Administration (OWWA), Philippine Coast Guard, ug mayores sa kalunsuran ug dakbayan sa Misamis Oriental.
Sa mando ni Gov. Bambi Emano, ang Provincial Employment Services Office (PESO) pinaagi ni Ms. Zorobabel Wabe Rabe maoy gitahasan pagplastar sa tanang rekisitos hinungdan sa malampuson kaayo nga pagpauli sa nasangpit nga stranded OFWs.
Gikan sa barko, deretso nang gipasakay sa rescue vehicles ang maong mga pasahero gilayon gihatud sa ilang tagsa-tagsa ka panimalay sa Misamis Oriental.