GIANDAM na ang lima ka ektaryang luna sa lungsod sa Initao kung diin mapahimutang ang bag-ong lokasyon sa Misamis Oriental Provincial Jail and Rehabilitation Center (MOPJ), partikularmente sa Brgy. Andales.
Mokabat sa 1,000 ka binilanggo ang masigo sa duha ka gambalay nga tukoron sulod sa lima ka ektarya alang sa lalaki ug babaye nga persons deprived of liberty (PDLs). Dunay double-deck bed sa matag kwarto alang sa duha lamang ka inmate.
Matud pa ni Provincial Jail Warden Dominador Tagarda, duna pay tukoron nga eskwelahan sa Technical Skills and Development Authority (TESDA) alang sa ilang Alternative Learning Center ug garden area.
Dugang ni Warden Tagarda, alang niadtong angay i-kwarentinas, dunay 14 ka lawak nga itukod alang kanila, kung diin gipaningkamotan karon sa pamunuan ni Gov. Bambi Emano nga mapaspasan og kahuman samtang nag-atubang pa kita sa hulga sa coronavirus disease 2019.