Gimando ni Gob. Bambi Emano sa mga buhatan sa Kapitolyo Probinsyal hilabi na sa PDRRMO ubos ni Mr. Jun Dy ug PSWDO nga atimanon gayud ang mga bakwit gikan sa Bukirang barangay sa Lagonglong nga anaa karon nagpasilong sa Capitol Plaza. Ang maong gamayng panon gikan sa Sitio Minkamanse, Banglay, Lagonglong, Misamis Oriental. Sila apektado sa nagpadayon nga kagubot tali sa mga militar ug mga armadong grupo sa maong lugar. Dugang pa sa amahan sa lalawigan nga ang mga batakang panginahanglanon susama sa pagkaon, medisina, mga sinina ug mga gamit pangkatulog hilabi na alang sa mga kabataan maoy unang mahatag sa Kagamhanang Probinsyal alang kanila. Ug atimanon sila samtang dili pa luwas mubalik sa ilang dapit.