Gibutyag ni Mr. Alberto Vera Cruz ang Amahan ug coach sa duha ka batang atleta sa dulang Chess na saludo kini kay Gob. Bambi Emano sa una palang ug mas samut na karung panahuna.
SA makausa pa, gipakita ni Gobernador Bambi Emano ang iyang kaikag sa pagsuporta sa tanang laraw sa mga atleta dinhi sa Misamis Oriental, suporta nga walay paglantaw sa bulok sa pulitika. Kini, human laing duha na usab ka atleta ang nakadawat sa ayudang pinansiyal alang sa ilang laraw didto sa nasud sa Thailand alang sa international competition.

Sila si Mheckhailah Vera Cruz, 9 anyos; ug igsuon niining si Quarl Maverick Vera Cruz, 8 anyos, sa ilang linghud pa kaayo nga panuigon, makigsangka na sa international arena sa sports nga chess. Ug, aron mas makaangkon pa sa kadasig sa ilang napiling event, nagtunol sa ayudang pinansiyal ang amahan sa lalawigan, isip tabang alang sa ilang mga galastuhan. Suma total, midawat sa P90,000 nga financial assistance ang duruha, nga gitunol atol sa sinemanang pagpakayab sa nasudnong bandila sa kapitolyo, Lunes, Hulyo 29, 2019.

Si Mheckhailah ug Quarl Maverick nakasungkit sa third place sa gipahigayong 9th Open Division Category of the 2019 National Youth & Schools Chess Championship Grand Finals, niadtong Hunyo 20 hangtud Hunyo 25, sa Batangas State University. Maoy hinungdan nahimong silang representante sa Eastern Asia Youth Championship karung umalabot Agusto 1 hangtud Agusto 10, 2019, sa Thailand.

Malipayong gidawat sa duruha ang ayuda nga gitunol mismo ni Gobernador Bambi ngadto kanila, kauban ang ilang amahan nga si Alberto nga nagsilbing coach sa duha ka elementary graders.

Matud ni Mr. Vera Cruz, dakung tabang alang kanila ang ayuda ni Gobernador Emano, hilabina sa ilang balayrunon sa plane ticket, ug sa inadlaw-adlaw nilang galastuhan samtang atua gawas sa nasud.