Giturnover sa Deparment of Trade and Industry ang Cacao Post-Harvest Facilities atol sa senemanang pagpakayab sa nasudnong bandila sa kapitolyo probinsyal, Marso 9, 2020.

Kini ubos sa DTI-Shared Service Facility sa pangagamhanang lokal sa Misamis Oriental nga nagkantidad P800,000 ang giingong proyekto.
Benepisyaryo sa Misamis Oriental Cacao Industry Development Association (MOCIDA) ang 5 ka lugar nga mao ang Claveria, Alubijid, Opol, Manticao, ug Gingoog City. Ang matag lugar makadawat ug tagsa ka solar dryer, ug tagsa ka fermentation box. Adunay 3,067.22 ka ektarya sa cacao sa Misamis Oriental sukad niadtong Disyembre 2019 nga makahatag ug panginabuhian sa 3,071 ka mga mag-uuma.

Si DTI Provincial Director Almer Masillones nagkanayon nga dako gayod ang suporta sa pangagamhanang lokal sa Misamis Oriental hilabina ni Gobernador Bambi Emano sa industriya sa cacao sa lalawigan.

Ang industriya sa cacao ang usa sa mga prayoridad nga programa ni Gobernador Bambi Emano diin nagtinguha sa pag-establisar sa lalawigan sa Misamis Oriental isip “Chocolate Capital of Northern Mindanao.”