NAKADAWAT sa P250,000 cash ang Commuters Drivers and Operators Transport Cooperative (CDOTransCo) isip ayuda sa pangagamhanang lokal sa Misamis Oriental alang sa pagpatuman sa ilang mga proyekto ug programa nga makabenepisyo uyamot ang ilang mga miyembro.
Sa sinemanang pagpakayab sa nasudnong bandila sa kapitolyo niadtong Mayo 18, 2020, maoy pagtunol ni Gov. Bambi Emano ug Provincial Coop Officer Mr. Alberto Acain sa nasangpit nga hinabang ngadto kang CDOTransCo chairperson Mr. Nestor Babol, kinsa nagpahayag sa iyang hilabihan nga kalipay sa nadawat nga ayuda alang sa ilang dugang capital sa ilang taxi operation project.
“In behalf of the members of CDOTransCo, daku kayo akong pagpasalamat sa financial assistance nga gihatag sa among idol nga si Gov. Bambi Emano. I salute you kay nakahatag mo og assistance sa amo, rest assured nga kining kwarta among gamiton sa maayo nga pamaagi aron molambo ang among cooperative dinhi sa Misamis Oriental,” sulti pa ni Mr. Babol.
Natukod ang CDOTransCo niadtong Hunyo 24, 2011, nga adunay 103 ka aktibong miyembro. Anaa naka-base sa Villa Trinitas Subdivision, Bugo, Cagayan de Oro.