LABIHAN karon ang kasubo nga gibati ni Misamis Oriental Governor Bambi Emano uban sa mga ulo sa departamento sa kapitolyo probinsyal human gipugngan sa korte ang pag-implementar sa budget ordinance alang ning tuig 2020 sulod sa 20 ka adlaw pinaagi sa gipagawas nga Tempory Restraining Order kun TRO.
Adlawng lunes dihang nadawat ni Gobernador Emano ang kopya sa TRO nga giisyu sa Regional Trial Court Branch 24.
Ang pagpugong sa pag implementar sa annual budget nag-ugat sa kaso nga gipasaka ni Bise Gobernador Jonahmar “Jigjag” G. Pelaez, Board Member Jerry V. Khu ug Board Member Jessa Mugot.
“Kining TRO, even a single drop of gasoline that will be used by any department within the Province of Misamis Oriental, bawal,” sulti ni Atty. Neil Pacana kung unsa kahasol ang paglihok karon sa kapitolyo nonot sa gipagawas nga mando sa korte.
Tungod niini, Dili matago sa amahan sa lalawigan ang gibati niining tumang kasubo labi pa kay natunong sa panahon nga ang lalawigan naningkamot sa pagpakigbatok sa Corona Virus Disease (Covid-19).
Nabalaka siya sa dakung epekto niini tungod kay maparalisa ug mabalda ang paghatod ug serbisyo publiko ug mga programa alang sa katawhan sa lalawigan.
Gani, ang mga sakop sa Misamis Oriental Department Heads Association kun MODHA duna nay tagsa tagsa ka mga tahas sa pag-gunit ug nagkalain laing komitiba aron pakigbatukan ang makamatay nga sakit.
Tungod sa TRO, labing maapektuhan mao ang inadlaw adlaw nga rasyon sa kapin 500 ka mga piniriso diha sa Misamis Oriental Provincial Jail (MOPJ), mga pagkaon sa mga police, sundalo ug bombero nga nagsilbing frontliners diha sa mga entry ug exit points sa lalawigan, mga pagkaon ug tambal sa mga naadmit nga mga pasyente diha sa walo ka mga provincial hospitals, mga suhulan sa tanang casual ug job order employees, pagatiman sa mga ROFW’s ug LSI’s, ug uban pang mga serbisyo nga adunay kalambigitan sa pagpagawas ug pondo.
“All these actions will definitely involve disbursement of funds which the temporary restraining order seeks to enjoin. In as much as we wanted to implement projects , we cannot legally do so due to said TRO,” matud ni Gobernador Bambi.
Tungod niining dili tiaw nga hagit sa pangagamhanan karon, naghangyo ang gobernador sa pagsabot ug suporta gikan sa publiko.
Gipasalig ni Governor Bambi Emano kuyog ang iyang mga abogado nga himoun ang tanang legal nga mga paagi aron hangyuon ang korte nga ilibkas ang temporary restraining order.
Tinguha sa administrasyon nga dili matanggong ug dugay ang paghatud ug serbisyo ngadto sa tanang mulopyo sa Misamis Oriental.