HILABIHAN ang pasalamat sa Department of Labor and Employment (DOLE-10) ngadto sa pangagamhanang lokal sa Misamis Oriental tungod sa aktibo ug maabtikong suporta ni Gobernador Bambi Emano alang sa katumanan sa mga programa nga halad sa kabatan-onan.

Kini, bisan pa nga mikabat sa 1,370 ka benepisyaryo sa Special Program for the Employment of Students (SPES) ang nadugang sa ihap sa kabatan-onan nga natabangan sa kapitolyo, dili lamang pinaagi sa pagtunol sa ilang suholan, apan ang bulawanong kasinatian nga ilang naangkon samtang nanarbaho panahon sa bakasyon niadtong Mayo 2019.

Atol sa culminating activity sa SPES niadtong Hulyo 19, 2019, midawat sa ilang suholan ang 1,370 ka benepisyaryo sa nasangpit nga programa isip job facilitators sa nagkadaiyang kabaranggayan sa Misamis Oriental. Ang ilang trabaho sulod sa 20 ka adlaw mao ang pagpangita’g mga kompanya nga nakabase sa lalawigan nga nagkinahanglan og trabahante, susama sa panday, mason, mananahe, ug uban pa.

Kung kaniadto, ang SPES beneficiaries gihimong tig-survey sa mga politico, karon, nahimong bulawanon ang ilang trabaho tungod kay nakatabang sila sa pagsulbad sa unemployment sa lalawigan nga mi-resulta usab sa pagkunhod sa ihap sa kapobrehon. Matud ni Ms. Alice Tinhay, ang DOLE-10 Focal Person, kung wala ang hugot kon all-out nga suporta ni Gob. Bambi Emano, inabagan sa Public Employment Services Office (PESO), ang programang SPES dili gayud magmalampuson.

Gani, doble pa ang ihap sa mga grantees kompara sa milabay nga tuig 2018. Mensahe pa ni Ms. Tinhay ngadto sa mga benepisyaro nga unta mahimong inspirasyon sa ilang pagtungha ang ilang kasinatian sa nasangpit nga programa.

Mikabat na sa kapin 5,000 ang kabatan-onang natabangan ni Gobernador Bambi Emano sa ilang pagtungha pinaagi sa SPES, mga kabus, apan takus nga ayudahan sa pinansiyal nga aspeto. Sa mga damgo’g panlimbasog sa kabatan-onan, nanganti ang gobernador nga samtang siya pa ang namunuan, sila makalaum sa hugot nga suporta’g pagpaluyo sa lokal nga pangagamhanan hangtud nga ilang makab-ot ang pangandoy sa kinabuhi ug maayong kaugmaon.