Kagahapong adlawa atol sa pagpakayab sa nasudnong bandila, nga gipangulohan usab sa buhatan sa PDDRMO, gipahigayon ang pagpanalangin sa dugang rescue vehicles alang sa mga kalihukan sa maong buhatan. Mismo si Gob. Bambi Emano ug PDRRMO Head Jun Dy ang nangulo sa maong kalihukan, lakip sa mga ulo sa buhatan ug departamento uban usab nila ni Board Member Boboy Sabal, Wayne Militante ug Lenny Winstanley. Sa iyang gipadangat nga taho nga mga kalampusan sa ilang buhatan, mibutyag si Mr. Jun Dy nga ang tanang kalampusan sa pagresponde, pagpahimangno ug pagmonitor sa seguridad sa mga Misamisnon hilabi na panahon sa katalagman ug emerhensiya, nahimong posible tungod sa hugot nga suporta sa amahan sa lalawigan ngadto kanila ug sa kinatibuk-ang Kagamhanang Probinsyal.