SI Julie Tagarda Dagala, Day Care Worker sulod sa 25 na ka tuig, nagkanayon daku’g ikatabang ang Day Care Center kung matukod kini sa Sitio Capunggukan, Brgy. Looc, Salay, Misamis Oriental, hilabina sa pagka karon, anaa ang kabataan magpahigayon sa klase sa may plaza.

Mao na lamang ang dakung pasalamat ni Ms. Dagala nga nahatagan intawon ang ilang barangay sa ayudang pinansiyal alang sa pagpalit sa luna nga katukoran sa tunghaan alang sa gagmay’ng kabataan. Niadtong Lunes, Setyembre 23, 2019, gitunol ni Gobernador Bambi Emano ang P80,000 balor sa pundo ngadto kang Kapitan Felixarte Agukoy ug Salay Mayor Angelo “Jun-Jun” Capistrano alang sa maong katuyoan.

Dunay hamubo nga programa alang sa turnover of funds niadtong tungora. Mapasalamaton ang duha ka opisyal ngadto sa gobernador. Samtang, atol sa gipahigayon nga Brgy. BAMBI (Bililhon Ang Matag Baryuhanon Ipalambo) sa lungsod sa Binuangan, nagtunol usab agn pangagamhanang lokal sa Misamis Oriental og balor P300,000 nga pundo alang sa Phase 1 sa repair sa multi-purpose hall sa Brgy. Kitambis.

Ang pundo gikan sa Brgy. Empowerment Program ni Gobernador Bambi Emano. Malipayong nagpadangat sa iyang pasalamat ngadto sa gobernador si Kapitan Juderick O. Ellis. Sa Brgy. Dampias, laing P300, 000 nga pundo ang gidawat usab ni Kapitan Cerilo C. Ignalig alang sa iyang proyektong covered court. Samtang, si Kapitan Arsenionito S. Kho sa Brgy. Mabini nakadawat usab sa pundong P300, 000 alang sa proyektong basketball covered court.

Didto si MOISC General Manager Prexy Elipe alang sa signing sa memorandum of agreement tali sa mga kapitanes ug Provincial Government. Ang lungsod sa Salay consistent awardee sa National Most Child Friendly Municipality sa tibuok nasud. Ug, aron mas mapahingusgan pa kini, walay pagduhaduha nga misaad si Gobernador Bambi Emano nga mosuporta sa tanang kalihukan alang sa pagkab-ot sa maayong kaugmaon sa kabataan.