Nahimong magbalukon ug malampuson ang pinirmahay sa Memorandum Of Agreement (MOA) tali sa lokal nga pangagamhanan sa Misamis Oriental ug unom ka power generating companies sa lalawigan niadtong bag-ohay lang.

Sugod sa maong adlaw, 0.01 centavo sa kinatibuk-ang kinitaan sa power generation mopadulong na ngadto sa barangay, munisipyo, dakbayan ug lalawigan alang sa pagpatuman sa nagkadaiyang proyekto, isa na ang pagtukod sa Misamis Oriental Botanical and Tourism Complex sa lungsod sa Claveria.

Nunot na usab sa kamanduan sa Department of Energy Act 1992 nga tanang power generators mohatag sa 0.01 centavo sa ilang kinitaan ngadto sa barangay, lungsod o lalawigan kung hain sila nahimutang.

Alang kang Gobernador Bambi Emano, ang bahin sa pangagamhanang probinsiyal iyang gamiton alang sa pagtukod sa Agricultural Botanical and Tourism Complex hulip sa karon kay Cebu Pacific Flight 387 Shrine. Kini ang isa sa mga landmark projects ni Gobernador Emano sa Misamis Oriental sa dili pa mahuman ang iyang ikatulong termino, ang legasiya nga iyang pagka-gobernador.

Ang maong mga power generating companies naglangkob sa FDC Misamis Power Corporation, STEAG State Power Inc, Minergy Power Corporation, Mindanao Energy System Inc, King Energy Generation Inc, Kirahon Solar Energy Corporation. Tanang representante sa nasangpit nga mga kompanya, mapasalamaton sa amahan sa lalawigan sa iyang unconditional support sa business sector.

Nagtoo ug naglaum si Gobernador Bambi Emano nga sa mas dali nga panahon masugdan na ang pagtukod, kung diin mahimong kining isa sa pinaka-gibisita nga tourism destinations sa mga lokal ug langyaw’ng turista. Resulta niini, modaghan pa ang ekonomikanhong kalihukan nga mopataas sa salapianong kahimtang sa mga katawhan.