PIO, PIA, tunghaan sa MisOr, Oro coordination meeting pagbatok sa fake news nagmalampuson

KAPIN kon kulang 100 ang mitambong kagahapong adlawa Agosto 14 ning tuiga sa makasaysayanong coordinative meeting tali sa Provincial Information Office, Philippine Information Agency-10 ug representante sa nagkadaiyang tunghaan sa Misamis Oriental ug Cagayan de Oro, sa may Capitol Training Center sa kapitolyo, sa katuyoan nga hiusahan ang pagbatok sa fake news.
Ang amahan sa lalawigan sa Misamis Oriental Gobernador Bambi Emano dakung kalipay nga nakighimamat sa mga student leaders nga iyang gituohan nga makatabang ug adunay dakung impluwensya ngadto sa mga kabatan-onan karong panahuna sa pagpatunhay ilabina gamit ang modern technology ug batok sa mga balitang walay kamatuoran. Siya usab midasig sa mga styudante nga mobisita kanunay sa mga Library nga nahimutang sa ilang tunghaan kay sa mga libro walay fake news ug daghan pang inpormasyon nga makatabang sa ilang pagtuon.
Samtang si PIA-10 Regional Director Franklin Gumapon maoy mipasabot sa mga partisipante sa kinatibuk-ang katuyoan sa panagtapok nga adunay kalambigitan sa responsableng komunidad ilabina sa gitawag nga social media ug ang mga negatibong epekto niini. Daku usab iyang pasalamat sa lokal nga kagamhanan ilabina kang Governor Bambi Emano sa hugot nga suporta sa adbokasiya nga makatabang sa katilingban.
Si Mr. Dugaduga, isip speaker, mipasabot kon unsay katuyoan sa PCO Net isip gitahasan nga Convenor ngadto sa katilingban ug uban pang plano niini kauban ang Rehiyonal ug Nasyonal nga ahensya kalabot na sa pagpahunong sa gitawag nga “Fake News”

Facebook Link: https://www.facebook.com/MisOrPIO/posts/264657594145266