FARMER’S MARKET KARON SA
KAPITOLYO MIKITA OG P240,479.50

LAING kalamposan na usab sa ikaduhang hugna sa ‘Farmer’s Market’ karong adlawa sa hawanan sa kapitolyo tungod kay mikita kini sa kinatibuk-an og P240,479.50 gikan sa buntag paingon sa alas 8:00 karon sa gabii.
Gibutyag ni Linda Tecson kinsa Assistant Provincial Agriculturist nga pinakadako og halin ang fresh egg sa itik nga mobalor og P88,000.00 samtang mikita dayon ang gama sa itlog sa itik sama sa leche plan, salted egg ug balot mokabat sa P5,385.
Hurot usab ang box sa Oolong tea nga mobalor og P4,200.00 ang kita.
Ang mga prudukto sa piniriso sa Misamis Oriental Provincial Jail miabot sa P2,240.00 ang halin sa ilang ginamang chicharon ug uban prudokto.
Ang mga herbal products sa Victory global sama sa turmeric ug uban pa ang mikita sab og balor P4,062.00
Ang lamiang ginamos sa Titings product gikan sa Libertad ang mihalin sab og P3,700.00
Ang 4H Club nga gilangkoban sa grupo sa kabaton-anan sa Misamis Oriental nga nibida sa ilang mga preskong utanon ang mihalin usab og P5,555.00
Ang Doalnara nga sa usa sa dako og sales tungod sa mga organic nga prudokto sama sa lettuce, mushroom, ug uban pa ang mikita og P26,675.00
Samtang ang fish vendor sa Balingasag nga hapon na nahidangat ang nagdala og 30 kilos nga bangus ang halin deretso mikita og P4,022.00.
Ang uban prudokto sama sa bugas, coffee, tablea, wild honey, cassava krispies, fish cracker, barbecue, sweet corn ug uban processed foods ang mikita usab og maayo.
Matud ni Tecson nga misaka usab ang ihap sa misalmot karon semanaha nga moabot sa 25 ka partisipante o asosasyon kon itandi niaging semana sa pagsugod nga adunay 16 lamang ka mga operatiba ug asosasyon nga misalmot.
Dugang ni Tecson nga dako gyod kaayo kini nga tabang sa mga mag-uuma nga programa ug labihan gyod ilang pasalamat sa inisyatiba nga gihimo ni Governor Bambi Emano aron maila ang prudokto sa mga mag-uuma ug matagamtaman nila ang kita sa ilang gihagoan.
“Buyag kaayo atong farmer’s market karon kay gidumog gyod siya pag-ayo sa mga kunsumante. Naa gani uban nga alas 12:00 pa sa udto hurot na ilang baligya.” mapasigarbuhon nga pahayag ni Tecson ug mapasalamaton sab kaayo sa mga sakop sa prensa nga labihan ang pag-promote sa farmer’s market nga daw kanunay niyang madungog sa radyo, masaba sa mantalaan ug makita sa lokal nga telibisyon.
Gidugang niini nga sunod semana lauman mas daghang display pa ang mapalit sa farmer’s market.
Gidapit ni Tecson ang tanan nga Misamisnon nga adunay mga prudoktong ginama sa ilang lungsod sa pagdisplay sa ilang mga baligya tungod kay ekslusibo lamang kini sa mga mamaligyaay gikan sa kalungsoran sa Misamis Oriental. PR/PIO