PORMAL nang gisubhan ang gambalay sa produktong Oolong Tea nga nahimutang sa Barangay Kalagunoy, dakbayan sa Gingoog, Misamis Oriental, Enero 31, 2020.

Gisugdan kini sa usa ka misa nga gipangunahan ni Rev. Fr. Jong Sabuga, SSJV. Human sa misa, gipahigayon na dayon ang ceremonial ribbon cutting uban si Gobernador Bambi Emano, mga bisita gikan sa Department of Trade and Industry Region 10, Department of Science and Technology Region 10, mga miyembro sa Sangguniang Panlalawigan ug mga lokal nga opisyales sa dakbayan sa Gingoog. Human sa ribbon cutting, ang blessing sa giingong building kung diin mao usab ang processing plant sa Oolong Tea.

Gipa abot ni Provincial Agricilturist Jose Apollo Pacamalan iyang kalipay sa malampuson nga kalihukan kung asa nag-demonstrate pa ang taga Taiwan kon unsaon pagproseso sa produkto.

“Salamat sa inyo pag anhi ug hinaot nga kining kasaulogan karon makahatag usab ug giya sa mga maguuma, kay kani atong processing plant, kapasidad niini 100 hectares to 200 hectares nga iprocess nga tea, so dako ang challenge,” sulti ni Mr. Pacamalan.

Gidayeg Department of Trade and Industry 10 Regional Director Linda Boniao ang proyekto nga gipahingusgan ni Gobernador Bambi Emano. Nanghinaot si RD Boniao nga dili lang kini ang kataposan kung dili sugod pa lang sa daghan pang pwede maabot sa produktong Oolong tea.

“My coming here is other than to thank Governor, and of course Mr. Stephen Zhang, to witness the event, is to see how we can help further. Kani atong tea processing, nga dili lang siya mag end sa atong turn over and ceremony, but makabligya gyod ta, dili lang diri nga mahimong tourist site, unsaon pag position didto sa gawas taman diri sa sulod. Gikan sa Cagayan de Oro paingon sa other countries, nga maka export gyod unta ta,” hagit ni RD Boniao.

Gikabutyag nga napasagdan na ang Oolong tea nga tanom 20 ka tuig na ang milabay. Apan, tungod sa kaikag ni Gob. Bambi Emano nga mahatagan sa panginabuhian ang mag-uuma ug molupyo sa Kalagunoy, Gingoog, ug mga silingang kalungsuran, gihimo uyamot sa amahan sa lalawigan nga mabuhi kini pag-usab bisan gipasagdan na kini sa milabay nga administrasyon.