DILI gihapon pakalihok ang Office of Barangay Affairs (OBA) ubos sa pagpanguna ni Jener Alaba human lakip sa naapektuhan sa Temporary Restraining Order (TRO) nga gipagawas sa Branch 24 sa Regional Trial Court pagpugong sa implementasyon sa 2020 annual budget.
Gipasabot niini nga pending sa pagkakaron ang mga serbisyo nga ilang mahatag labina gikalambigitan sa mga barangay projects ug bugtong nga ilang mahimo lamang mao ang pagdawat sa mga request sa kabaranggayan sa Misamis Oriental hilabina dili pa makabisita sa field ug makapahigayon og ocular inspection sa mismong site tungod kay ultimo gasolina gidili man nga magamit.
“Pasabot lang mi karon nga period dili ta kalihok unya ang Provincial Engineering dili sila maka adto sa site tungod aning TRO mao jud na siya walay kulang walay sobra among pasabot sa ila. Kutob lang jud sa among mahimo maka anhi mo diri technical services rajud among ma serve sa inyo” pasabot ni Alaba.
Sa kasamtangan adunay 116 total nga barangay projects ang kinahanglan pa nga tibawason sa pangagamhanang lokal sa Misamis Orienta kon hain aduna kini gialokar nga pundo nga mikabat sa P117,601,274.98.