USA ka dakung sorpresa ang bitbit ni Gobernador Bambi Emano sa iyang pagbisita sa lungsod sa Initao niadtong Lunes, Setyembre 23, 2019. Dili lamang isa, apan tulo ka proyekto ang iyang gibubo sa nasangpit nga lungsod.

Didto na sa Initao mitambong sa sinemanang pagpakayab sa nasudnong bandila si Gobernador Bambi, kauban ang pipila sa mga Board Members, sila Board Member Boboy Sabal, Saysay Emano, Dexter Yasay ug Nancy Madjos.

Ang Brgy Himangpang, Initao, nakadawat sa P50,000 financial assistance alang sa promotion sa ilang programa sa turismo. Gidawat ni Kapitan Elmer Garcia ug iyang konseho ang maong ayudang pinansiyal pinaagi sa cheke.

Alang sa pagpalambo sa Local Government Officials and Employees Cooperative (LOGOECO) sa nasangpit nga lungsod, nagtunol sa cheke balor P200,000 ang amahan sa lalawigan.

Wala pa mahuman ang gobernador sa pagpangtunol og ayuda. Midangat kini sa Brgy. Calacapan alang sa pagtunol sa P600,000 pundo alang sa ilang proyektong pagtukod sa Phase 1 ug Phase 2 Day Care Center. Ang pundo niini, gikan sa programang Brgy. Empowerment ni Gobernador Emano.

Duha pa lang ka tuig ug tonga nga molingkod sa kapitolyo si Gobernador Bambi Emano, apan una na kining naghimo sa iyang “Great Vow” sa katawhan sa lungsod sa Initao, ang katawhan nga iyang gisilbihan sulod sa siyam ka tuig sa walay pagpihig ug pagpili sa bulok sa pulitika.