MAO ra’g magbaha ang Provincial Training Center sa kapitolyo sa Misamis Oriental niadtong Nobyembre 12, 2019, atol sa ika-5 nga executive meeting sa Local School Board. Kini, human giulan sa mga pagpasalamat ug pagdayeg ang amahan sa lalawigan, Gobernador Bambi Emano, sa iyang matarong ug maligdong nga serbisyo sa katawhan sa lalawigan sulod sa siyam ka tuig. Apan, una nang nagpasalamat ang gobernador sa siyam ka tuig nga gihatag kaniya nga oportunidad nga makasilbi sa katawhan sa Misamis Oriental.

Didto sa nasangpit nga panagtapok si Gobernador Emano isip chairman sa LSB, ug iyang mga miyembro, outgoing GPTA President Stevenson B. Tacbobo, kinsa bilib kaayo sa pamunuan sa kasamtangang pamunuan tungod kay suportado kanunay ang ilang mga lakang ug kalihukan alang sa pagpalambo sa edukasyon dinhi sa Misamis Oriental.

“Usa kini ka maayong leader sa probinsya. Naga-plano siya kung unsa gayuy kaayuhan sa future generation sa atong mga kabataan. Sa local school board halos tanan ginagmayng mga request sa skwelahan iya gyud na’ng gihatag. Talagsaun ra kaayo nga leader sa probinsya, gihatag gyud tanan, kontra ba ka o dili sa pulitika,” sulti pa ni Mr. Tacbobo.

Bisan si Division Federation PTA President Eric O. Mabelin hilabihan nga pagpasalamat ngadto kang Gobernador Bambi.

“Dili tiaw, makita nato gayud iyang makanunayon ug walay puas nga pagsuporta sa lalawigan sa MisOr hilabina sa Edukasyon. Sa school board, naka focus gayud kini ang mga proyekto ug mga programa nga haum alang sa 424 ka barangay sa lalawigan kung diin naa pud diha ang nagkadaiyang tulunghaan,” matud ni Mr. Mabelin.

Kung nagbaha man sa pangdaut ug pagbugal-bugal ang mga programa ni Gobernador Bambi Emano dinhi sa Misamis Oriental ug dakbayan sa Cagayan de Oro, apan naglunop usab ang mga pagpasalamat sa kinabag-ang katawhan ngadto kaniya, ang tawo nga ilang gituhoang maoy nagsulbad sa dugay na kaayong gihambin nga problema sa katawhan, hilabina sa problema ug utang sa lalawigan kaniadto nga gibilin sa kanhing namunuan sa kapitolyo.