NALIPAY man, apan nagguol si Gobernador Bambi Emano sa gisangputan ni Ms. Cindy Obeñita, ang bag-ong hirang nga Miss Cagayan de Oro 2019 bag-ohay pa lang. Kini, tungod kay pinaagi sa social media, gipanghimaraot ang iyang pagka-empleyado sa kapitolyo probinsiyal sa Misamis Oriental.

“Una, legitimate nga molupyo sa dakbayan sa Cagayan de Oro si Ms. Obeñita ug nanarbaho lang sa kapitolyo sa Misamis Oriental isip staff sa Provincial Tourism Office. Ikaduha, sala ba diay ni Atty. Jeffrey Saclot nga makaangkon siya sa gwapa ug bright nga empleyado?” matud ni Gobernador Emano.

Si Atty. Saclot maoy pangulo sa Provincial Tourism Office.

Matud sa post sa social media, unsaon man kono sa beauty queen ang pagpangatungdanan isip ambassadress sa dakbayan sa Cagayan de Oro kon empleyado siya sa kapitolyo. Apan, matud ni Ms. Cindy, walay problema alang kaniya tungod kay suportado kini sa iyang ulo sa departamento nga si Atty. Saclot kon ugaling gikinahanglan kaayo ang iyang presensiya sa tanang kalihukan sa dakbayan.

Si Ms. Obeñita usa ka magna cum laude sa kursong Mass Communication sa Liceo de Cagayan University, ug naghakot og award atol sa grand coronation niadtong Agosto 24, 2019. Bitbit sa dalaga ang ubay-ubay nga special ug minor awards, susama sa: Best in Gown, Miss Support Zebra, Miss Coho Ambassadress, Miss Personality, Miss Peak Review Center, Miss Gaisano, Miss Bioessence ug uban pa.

Si Ms. Cindy na karon ang reigning Miss Cagayan de Oro human gi-turnover ni 2018 reigning Miss Cagayan de Oro Mary Chris Suico ang korona.

Hangyo sa gobernador nga unta dawaton na lang sa katawhan si Ms. Obeñita, tungod kay dili sala sa dalaga nga mapili isip Ms. Cagayan de Oro 2019.

Sa tanang kalihukan sa lalawigan sa Misamis Oriental, hilabina kon hisgotan ang pagpalambo sa industriya sa turismo, siyento porsiyento kini nga paluyohan ni Gobernador Bambi Emano. Ang pagka-ambassadress ni Ms. Cagayan de Oro Cindy Obeñita, matud sa gobernador, dakung tabang sa pagpalambo sa turismo dili lamang sa Cagayan de Oro, apan lakip na usab sa lalawigan.

*photo courtesy to MisOr Provincial Tourism Department*