Hingpit ang suporta nga gihatag ni Gobernador Bambi Emano ngadto sa duha ka mga batan-on nga naghatag ug dakung dungog dili lamang sa probinsya sa Misamis Oriental kung dili sa tibuok nasud sa Pilipinas.

Naghatag ug suportang pinansyal nga mokabat sa PHP50, 000 ang pangagamhanang probinsyal sa Misamis Oriental ubos sa liderato ni Gov. Bambi Emano ngadto sa duha ka mga batan-on nga makighilambigit sa ipahigayong 2019 US Kids Golf World and Teen World Championships sa nasud sa Pinehurts, North California, USA karon umalabot Hulyo 25-27 ug Agosto 1-3 ning tuiga.

Si Ms. Kiara Theres Zaldivar-Montebon edad trese (13) anyos ug Mr. Matthew Miguel S. Fabiala dose anyos (12) parehong mi-qualify nga maoy mahimong representante sa nasud sa Pilipinas para sa dulang golf sa umalabot 2019 US Kids Golf World and Teen World Championships, ang maong dula adunay kategorya basi sa edad nga sugod 6 anyos hangtud 18 anyos, ug sa edad 12 ug 13, ang duha ka mga batan-on lamang ang mi-qualify sa bag-ohay lang nga gipahigayong 2019 Philippine International Qualifying Tournament. Silang duha puro nakadawat ug tig PHP50,000 isip ayuda sa ilang mga galastuhon samtang sila gapaningkamot aron mahatagan ug dungog ang nasud sa Pilipinas hilabina ang probinsya sa Misamis Oriental.

Nagpaabot usab ug dakong pagpasalamat ang ilang mga ginikanan ngadto kang Gobernador Bambi Emano tungod kay wala kini magmakuli ug tabang kanila.

Nagtuo si Gobernador Bambi Emano nga kulang pa ang suportang pinansyal nga iyang gipaabot tungod sa ilang gihatag nga garbo dili lamang sa nasud sa Pilipinas apan lakip na sa tibuok kalibutan. Daku usab ang pagtuo ug pagsalig sa Gobernador nga masunggit ni Ms. Montebon ug Mr. Fabiala ang kadaugan.

Link: http://www.cdodev.com/2017/06/29/2-cdo-kids-to-represent-the-philippines-in-us-junior-golf-tourneys/