SA Provincial Social Welfare and Development Office (PSWDO) pa lang daan, mikabat na sa ₱2,175,200 nga cash assistance, bugas, food packs, ug uban pang hinabang ang gitunol sa pamunuan ni Gov. Bambi Emano sa katawhan sa probinsya sa Misamis Oriental.
Kaniadto nga novel coronavirus (NCov) pa ang tawag sa coronavirus disease 2019, nagsugod na og paabot sa iyang hinabang si Gov. Emano, tungod kay nakita na sa amahan sa lalawigan ang umalabot nga krisis nga hatud sa hulga sa makamatay nga sakit.
Gitataw ni PSWDO head Mr. Jhunleymar Abella nga wala pay labot niini ang hinabang nga gitunol sa Provincial Tourism Office alang sa 458 locally stranded individuals (LSIs) ug returning overseas Filipinos (ROFs) nga natunolan sa ₱570,000 nga cash assistance; ayuda sa Provincial Agriculture Office (PAGRO) ngadto sa mag-uuma; ug milyon-milyon nga cash assistance sa kooperatiba pinaagi sa Provincial Cooperative Office.
Sugod sa Marso hangtud Hunyo 2020, nikabat na sa 528 ka sinakong bugas nga nagkantidad og ₱660,000; ug 2,919 ka food packs nga nagkantidad og ₱875,700, ang naapod-apod ni Gov. Bambi pinaagi sa PSWDO. Duna pay cash assistance nga natunol ngadto sa mga kanhi rebelde ug chaplains sa tibuok lalawigan; make-up ug hairstyle artists, ug frontliners.