NAGYUKBO nagahangyo karon si Misamis Oriental Governor Bambi Emano ngadto sa katawhan sa lalawigan ning nasinati ang krisis sa panglawas ning makapatay nga hatod sa Corona Virus Disease (Covid 19).

Matud ni Emano nga nakab-ot sa lalawigan ang mga tag as ug dagkong pasidungog tungod sa kooperasyon ug tabang sa katawhan sa lalawigan ug malaumon kining malampasan ra kini nga problema.

“Nanay, tatay mga igsuon sa lalawigan. Nganong nagmalampuson ta sa Misamis Oriental, nganong nakab-ot nato ang mga daghan ug dagkong ganti sa katawhan sa probinsya, tungod kay nagkahiusa ta, ako nagpanghinaot nga ang atong panaghiusa dili lang unta para sa pagkab-ot sa ganti apan apil kining daghang pagsuway karon labina ning pagsuway sa sakit nga Coronavirus.”

Matud ni Emano kanunay nga gibalik balik sa Department Of Health nga kung adunay nasinatian nga hilanat, ubo ug sip-on ang modangop dayon sa ilang mga health official sa kabarangayan.

“Ireport ninyo palihog, kung duna kamoy gibati hilanat, ubo, sip-on o sintomas sa virus palihog pagpahibalo,” matud niini.

Dugang ni Emano nga ang matag usa dunay responsibilidad sa matag lumulopyo sa lalawigan.

“Matag usa kanato dunay responsibilidad sa mga molupyo sa lalawigan. Be responsible for your neighbor,” hangyo ni Emano.