NANGANTI si Gobernador Bambi Emano nga andam kini motabang ug motunol og hinabang sa lokal nga pangagamhanan sa dakbayan sa Cagayan de Oro bisan tuod hangtud lamang sa Misamis Oriental ang iyang government jurisdiction, sa katuyoan nga mahiusahan ang pagpakgang sa posibleng pagkatag ug pagtakboy sa coronavirus disease (COVID-19).

Nagtuo si Gobernador Emano nga dili na kinahanglan mag-ila og boundary ang pagtabang sa atong silingang pangagamhanan hilabina kon alang kini sa kaayohan sa kinabag-an.

“I will work with the city government in whatever capacity and whatever they need, the Provincial Government will be there. Ever since, when I give my word it’s my bond. So, DOH can be pretty certain, I told Director Adriano Subaan that I will work with the City Government in whatever capacity and whatever they need, certainly the Provincial Government will be there,” panganti ni Gobernador Bambi.

Bisan wala pa maghangyo ang namunuan sa Cagayan de Oro nga unta makig-alayon si Gov. Emano sa ilang mga plano hilabina sa sugdan nga communitywide quarantine karong alas 12:01 sa buntag, Biernes, Marso 20, 2020, apan nagsulti nang daan ang Gobernador nga ang pagsagubang sa delobyo nga atong giatubang karon, angay gayud nga hiusahan sa tanang lideres sa Misamis Oriental ug nasangpit nga dakbayan.

Sa Misamis Oriental, nagkauyon na sa plano nga ipaubos ang tibuok lalawigan sa community quarantine human sa gipahigayon nga COVID-19 Provincial Coordinative Meeting kaganina sa buntag, Marso 19. Wala pay pinal nga desisyon ang inter-agency body sa pagka karon, apan kung si Gov. Emano ang pabut-on, gusto niini nga andamon una tanan ang gikinahanglan, hilabina ang pagpahibalo sa publiko sa kalagdaan, samtang gipaubos kita sa kwarentinas.

Sa pagka karon, kamulo na gi-plantsa ang guidelines kalabot sa himuong community quarantine sa Misamis Oriental, sa papangulo sa Provincial Health Office.