GITATAW ni Gobernador Bambi Emano sa prensa nga wala pay ni usa nga molupyo dinhi sa Misamis Oriental nga nagpositibo sa coronavirus disease 2019 (COVID-19) kaluoy sa Dios. Apan, ang Provincial Health Office, matud sa gobernador, dunay giatiman nga pipila ka persons under investigation (PUI) ug persons under monitoring (PUM).

“Klaruhon nato ni, wala pay (nagpositibo) sa Misamis Oriental, naa lang tay PUM (Person Under Monitoring) ug PUI (Person under Investigation) monitoring and under investigation. Klaruhon nato, wala pay naapektuhan sa pagkakaron nga gihatag nga detalye sa DOH (Department of Health),” sulti ni Gobernador Emano.

Apan isip paglikay nalang samtang sayo pa, kahinumduman nga nagpagawas og resolusyon ang Sangguniang Panlalawigan sa Misamis oriental nga ipaubos sa state of calamity ang lalawigan, tungod sa hangyo sa gobernador isip paniguro nga nakaandam na kita sa posibleng grabe nga sitwasyon.

“Trust your mayors. Let your mayors decide for you. They know better. Trust your barangay captains. The reason why I created this barangay empowerment program, it’s because I really wanted to empower the barangays to give them the power to decide among themselves what’s good for their barangay and what is not,” dugang pasabot ni Gov. Emano.