GIRE-ECHO ni Governor Bambi Emano ang mga gihisgotan sa bag-ohay lang natapos nga Governor’s League nga gipahigayon didto sa probinsya sa Ilocos Sur niadtong adlawng Biyernes.
Matud ni Gov. Bambi nga nagkatigom ang tanan gobernadores sa tibouk nasod ug nagsilbing host ang Ilocos Sur ubos ni Governor Ryan Singson nga takdo sab nisaulog sa ilang ika 200th nga katukoran sa probinsya, Si Gov. Singson mao sab ang presidente sa Governor’s League of the Philippines.
Mitambong sa dakong kalihokan mao sila si Chief Presidential Legal Counsel Secretary Salvador Panelo; Department of Tourism Secretary Wanda Corazon Teo; si Presidential Spokesperson nga si Secretary Harry Roque ug Presidential Communication Operation Office Secretary Martin Andanar.
Matud ni Gov. Bambi nga sa maong panagtigom sa tibouk Gobernador gihisgotan ang ilang posisyon ug papel ngadto sa gikatakdang pag-usab sa pangoberno ngadto sa pederalismo.
“Kami sa mga Gobernadores uyon nga angayan na usbon ang sistema ngadto sa federal form of government.” matud ni Emano.
Numero unong punto sa gihisgotan mao kini ang saktong pagbahin sa buluhisan nga sama niining buhis nga nagikan sa probinsya ang dili na ipadala ngadto sa kaulohan susama sa kasagaran nga kwentada nga 60% ang alang sa national ug 40% lamang ang sa probinsya.
Bout nilang mausab kini nga dili na ipadala didto sa kaulohan ang tanan ug ang probinsya mao nay mag kuha og 60% ug ang national hatagan na lamang og 40% kini tungod kay aron mas maboboan og mga proyekto ang mga lugar nga nagkinahanglan pag-ayo sa matag probinsya.
Gibutyag sab ni Emano nga ikaduha sa ilang punto mao ang pagpalambo ug pagpalig-on sa tanan mga Regional Offices.
“Ang nahitabo kon dako ka nga negosyante kung magbubo ka og kapital denhi sa Misamis Oriental ang mahitabo ang ilang mga permit toa sa kaulohan ang mopirma toa sa kaulohan so makasapi pirme ang kaulohan.”
Dugang ni Gov. Bambi nga kinahanglan palig-onon ang tanan Regional Offices aron dinhi na mobayad ug molukat og permit ang mga negosyante ug uban pa nga mga rekisitos nga kinahanglan sa Regional Offices kuhaon.
“Ang atoa nga e-strenghten ang atong mga Regional Offices para dinhi na sila mobayad para ang kwarta naa denhi mopaingon sa Misamis Oriental, sa mga munisipyo ug naa sa siyudad. ” dugang ni Gov. Bambi.
Sa pagkakaron gibutyag ni Gov Bambi nga gipadala na nila ilang position paper sa mga nauyonan ngadto sa Malacanang, Kamara ug Senado kalabot sa ilang dakong pag-uyon sa Federal form of Government nga gilaumang dakong tabang sa kabag-ohan sa pang-gobiyerno. PR/PIO