MAHINUNGDANON uyamot ang pagpahigayon sa ika-22 ka tuig nga “Paghandum” sa Cebu Pacific flight 387 crash niadtong Pebrero 2, 2020, sa may boundary sa lungsod sa Claveria ug dakbayan sa Gingoog kung diin nahimutang ang Flight 387 Shrine. Gani, daghan nakasulti nga maoy nahimong rason ang kamatayon sa 104 ka pasahero ug airplane crew nga molambo ang lugar ug mabuhatan og dalan ug ma-semento.

Nahitabo ang nasangpit nga makalilisang nga trahedya niadtong Pebrero 2, 1998, ug dili ikalimod daghang kalamboang ekonomikanhon ang natunol sa katawhan sa mga lugar haduol sa shrine.

Matud pa ni Fr. Eleuterio Datoy, kinsa maoy nangulo sa santos nga misa sa sayong buntag, nahimong dan-ag sa dalan ngadto sa maayong kaugmaon sa Claveria ug Gingoog ang kamatayon sa mga biktima.

Bisan si Board Member Wayne Militante, kinsa nag-representar kang Gobernador Bambi Emano, nagkanayon maoy rason ang trahedya nga nabuhatan og dalan ug na-semento pa ang lugar nga nag-konektar sa Claveria ug Gingoog.

Lakip si Provincial Tourism Officer Atty. Jeffrey Saclot nagkanayon nga dunay inisyal nga P17 milyones nga pundo ang gitagana ni Gobernador Emano alang sa pag-develop sa lugar nga nahimutangan sa shrine, kung diin gilauman nga matukod dinhi ang Misamis Oriental Agriculture and Tourism Complex with Botanical Garden.