GISUGDAN na pagbalik sa Provincial Agriculture Office (PAGRO) niadtong Hulyo 4, 2020 ang ilang Integrated Rice Duck Farming System human maundang sa milabay nga tuig.

Ang maong programa ubos ug kabahin sa Sustainable Agriculture Farming System – Rice Program sa buhatan.

Ang hugaw sa mga pato mao ang magsilbing fertilizer sa mga benepisyaryong rice farmers arun maka prodyos ug ‘organically grown rice’ nga mao ang tumong sa programa.

Karung semanaha lamang, nakahatag na ang buhatan sa dili mominos sa 300 ka mga duckling heads sa duha ka mga mag-uuma sa Brgy. Mat-i lungsod sa Claveria ug sa Brgy. Mandangoa, lungsod sa Balingasag.

Usa niini si Marciano Gumungon nga natunolan ug 150 ka mga duckling heads ug
usa ka sako sa duckling feeds niadtong August 14, 2020 nga nagpadangat sa iyang pagpasalamat human madawat sa PAGRO ang iyang request ug nakapasar sa validation.

Ang IRDFS program sa PAGRO nahimong posible sa pakig-alayon niini sa Minergy Power Corporation nga nagtabang sa pagpundo sa maong programa ug nagtabang usab sa pag-ila sa mga mag-uuma nga angay maserbisyuhan ubos sa maong programa.

Laraw sa IRDFS nga matabangan ang mga mag-uuma pinaagi sa pagpaubos sa production cost niini arun mahimong posible ang mas dakong kita.

Usa lamang kini sa mga daghang programa sa buhatan ubos sa pagpangulo ni Provincial Agriculturist Jose Apollo Pacamalan ilawom sa mando ni Gobernador Bambi Emano nga matabangan ang mga mag-uuma ug mapalambo ang ilang panginabuhian dinhi sa tibouk lalawigan sa Misamis Oriental.