BALOR P19,998,743.32 nga proyektong dalan sa lungsod sa Jasaan ug Claveria ang gisubhan na niadtong Oktubre 15, 2019, ang dalan nga mosulbad sa suliran sa katawhan, hilabina mag-uuma nga hilabihang nagkinahanglan niini.

Si Mrs. Arsenitas Vadom, molupyo sa Jasaan, nagkanayon nga mapasalamaton kaayo kini ngadto kang Gobernador Bambi Emano sa proyekto nga gipatuman sa gobernador sa ilang lugar, kung diin dugay nang panahon nga sila nagdamgo sa susamang proyekto, apan karon lang intawon sila natunolan.

“Nagpasalamat ko kang Gob. Bambi Emano kay iyang gi ayo amoang dalan nga sa una guba gayud kaayo ug lisod ang sitwasyon sa mga taga dinhi,” matud pa ni Mrs. Vadom.

Nanguna si Gobernador Bambi Emano sa groundbreaking and capsule laying ceremony nga gipahigayon sa Purok 4, Upper Natubo, Jasaan, alang sa paghatag paglaum sa katawhan sa lugar ug mobalik ang ilang pagsalig sa pamunuan sa nasangpit nga lungsod human kini gipasagdan sa milabay nga administrasyon.

Ubos sa tema: “Dalan sa Kabukiran Ampingan, Abot sa Kaumahan Mapuslan”, ang pundo niini gikan sa Conditional Matching Grant to Provinces (CMGP) sa Department of Interior and Local Government (DILG). Didto mitambong sa kalihukan sila si Board Member Saysay Emano, Boboy Sabal, Nancy Madjos, Dexter Yasay, Lanoy Winstanley, Wayne Militante, ug Kerwin Soldevilla.

Mapasalamaton uyamot si Jasaan Mayor Redentor S. Jardin ug si Vice-mayor Juan Po sa katumanan sa ilang mga pangandoy.

Si Kapitan Francisco T. Longkiao sa Brgy. Upper Natubo, nagkanayon dakung kapuslanan pohon ang nasangpit nga proyekto panahon nga mahuman na kini.

“Kaning gihimo sa atong pinalanggang Gobernador sa atong lugar, dako kaayo og tabang kay kini ang gihatag niya nga proyekto mapuslan gayud sa katawhan,” dugang ni Kapitan Longkiao.

Sa kasamtangan, nagsugod na ang pagtrabaho sa Jasaan-Claveria Provincial road, laing proyekto nga magdala og dugang ekonomikanhong kalihukan sa tanang molupyo sa duha ka lungsod, hilabina mas daghan kanila ang makasulod sa trabaho, susama sa panday, mason, labor ug uban pa. Ug, matud ni Gobernador Bambi Emano, dili kini moundang sa pagpangita’g paagi nga ma-semento ang kadalanan sa probinsiya nga gamit uyamot kaayo sa publiko.