MAAYO na lang dunay usa ka adlaw nga pulos lamang lulinghayaw ang atimanon sa kababayen-ang kawani sa kapitolyo probinsiyal ning bulan sa Marso.
Isip pahalipay ni Gobernador Bambi Emano ngadto sa mga babayeng empleyado sa kapitolyo sa Women’s Month Celebration ning bulan sa Marso, pulos kalingawan, kaon ug kalipay ang ilang atubangon ug buhaton sulod sa usa ka adlaw nga ting-trabaho.
Gilauman nga karong petsa 21 sa Marso, magpabugnaw ug maglingaw-lingaw sila sa usa sa mga tourist destinations sa Misamis Oriental. Duna pay libreng manicure, pedicure, hair dressing ug masahe nga halad sa pangagamhanang lokal ngadto kanila.
Ang maong adlaw sa lulinghayaw maoy ikatulong higayon nga gipatuman ni Gobernador Bambi Emano alang sa kababayen-ang empleyado sa kapitolyo, isip bugti sa ilang hago ug tunhay nga serbisyo ngadto’s katawhan sa lalawigan sa Misamis Oriental. Kini, aron usab pagdasig kanila nga dili maluya sa pagserbisyo sa kinatibuk-ang duot nga mao ang katawhan, hilabina ang kabus.

Photo Credits to: Gerry Gorit