GIBIDA ni Governor Bambi Emano ang kalamposan sa Misamis Oriental sa programang panglawas atol sa academic conference o colloquium sa Provincial Leadership and Governance Program (PLGP).
Usa si Governor Bambi sa unom ka mga gobernador nga miyembro ubos sa PLGP kon diin ang konperensya nga adunay tema ‘Reframing Universal Health Care in Time of Disruptions’ gipahigayon adlawng Miyerkules, Hulyo 22, 2020.
Ang Health Leadership and Governance Program (HLGP) gipasiugdahan sa Zuellig Family Foundation uban sa pakig-alayon sa Department of Health (DOH) ug United States Agency for International Development (USAID) diin dinhi nagsumikad ang pagkalunsad sa PLGP kon asa ang Misamis Oriental usa sa partner province sukad pa niadtong tuig 2017.
Nakapunting ang mga programa niini sa leadership competencies arun makab-ot ang mga tinguha sa gobyerno sa family planning, tubercolosis, maternal neonatal ug child health.
Gilusad sab kini aron mapalapdan ang perspektibo sa mga gobernadores sa pagpanguna sa mga reporma sa panglawas sa probinsya ug mga ospital.
Kauban ni Governor Bambi atol sa conference sila Antique Governor Rhodora Cadiao, Basilan Governor Hadjiman S. Hataman-Salliman, Saranggani Governor Steve Solon, Guimaras Governor Samuel Gumarin, ug Zamboanga Del Norte Governor Roberto Uy.
Nagsilbi usab nga bisita si Sultan Kudarat Governor Pakung Mangudadatu.
Panelist sa diskusyon ang Board of Trustees ug Presidente sa Zuellig Family Foundation nga si Ernesto Garilao ug Yolanda Oliveros kinsa Deputy Director of the USAID Office of Health.
Naghatag usab sa iyang reaction human sa panel discussion si former Health Secretary ug ZFF trustee Dr. Esperanza Cabral.
Unod sab sa konperensya ang pagbinayloay ug mga ideya sa mga partisipante alang sa paspas nga pagpalambo aron maangkon sa mga kabus ang barato nga pagpanambal kon healthcare.
Sa maong colloquium ug panel discussion nahisgutan og lakip ang mga emerging concerns bahin sa pakigbatok sa Corona Virus Disease (Covid-19).
Gipangutana usab ang mga gobernador kalabot sa ilang mga kalamposan nga mga programa sa panglawas sa ilang tagsa-tagsa ka probinsya.
Sa parte ni Governor Bambi gi-eksplekar niini iyang mga programa sa walo ka mga balay tambalanan sa probinsya.
Gihisgotan sab sa amahan sa lalawigan ang kalisod sa mga kabus kaniadto sa pagpaospital tungod sa kahadlok nga walay ikabayad apan sa iyang paglingkod isip gobernador nasulbad kini nga problema pinaagi sa iyang gilusad nga Misamis Oriental Care System kon MisOrCares niadtong 2013 kon diin nakatabang kini sa 450,000 ka mga Misamisnon sa wala pa ma-implementar ang no-balance billing sa PhilHealth.
Mapasigarbuhon sab kining nag-ingon nga kung kinsa man ang magpatambal sa mga pangpublikong ospital sa probinsya, mugawas kini nga sigurado nga adunay insakto nga tambal nga madala.
Napangutana usab si Governor Bambi bahin sa iyang mga pamaagi sa pakiglambigit sa mga mayores sa mga munisipyo alang sa pagpakusog sa Health system sa probinsya bisan pa man og dili niya kini kaanib sa pulitika.
Tubag niini sa gobernador nga siya nasayod nga walay bisan kinsa ang milampos nga nag-inusara busa ang PLGP wala lang nagtudlo kaniya sa pagpalambo sa health system sa probinsya kung dili apil usab nagtudlo kaniya sa pagpahiubos.
Gani tukmang pagpahiubos ang gihimo ni Governor Bambi ug nangayo sa pasaylo sa kung unsa man ang iyang nasulti nga mga pulong sa uban mga mayor sa mga milabay nga eleksyon ug bout niining kalimtan ang mga nilabay na.
Nagbunga ang pagkamahiubsanon sa gobernador kay ang ilang pagtinabangay, kooperasyon ug kolaborasyon kay nagpaubos kini sa ihap sa maternal death, tuberculosis, rabbies ug diarrhea ug uban pang mga sakit.
Nakatabang sab kini nga alyansa nga isalikway ang pulitika sa pagsugpo sa Covid-19.
Nagpasalamat si Governor Bambi sa PLGP tungod kay kini nagpakusog sa ilang programa sa turismo, ug niining panahon sa pandemya na-apod ug insakto ang tabang sa mga lungsod bisan pa man dili niya kapartido ang mayor.
Nagtoo sab ang Gobernador nga adunay igong panahon ang tanan tungod kay kaniadto pa siya giimbitahan nga mahimong kabahin sa PLGP apan nabalibaran ug karon nga nahimong kabahin sa programa nagtoo kini nga perpekto kini nga panahon sa pandemya ug dili aksidente lamang.
Sa katapusan nakat-unan ni Governor Bambi gikan sa programa ang maayong pakig-relasyon sa tanang mga chief of hospitals tungod kay importante kini aron siya maduolan sa panahon sa pangihanglan.