GISUBHAN na niadtong Lunes, Setyembre 23, 2019, ang balor P65 milyones kapin proyekto nga repair ug upgrading sa dalan gikan Brgy. Tangcub padulong Brgy. Lapad sa lungsod Libertad, Misamis Oriental, proyekto nga motubag sa problema sa katawhan sa kabukiran.

Ang Provincial Engineering Office (PEO) ang mangulo sa pagpatuman sa nasangpit nga proyekto sa dalan Libertad-Tangcub-Lapad Provincial Road gamit ang pundo nga nakuha sa kapitolyo gikan sa Conditional Matching Grant to Provinces (CMGP) sa Deparment of Interior and Local Goverement (DILG). Ang nasangpit nga pundo mahatag lamang sa mga lokal nga pangagamhanan nga adunay katarong sa pagpangalagad sa katawhan.

Ang pagsemento sa Libertad-Tangcub-Lapad Provincial Road isa lamang sa prayoridad ni Gobernador Bambi Emano sa nahibiling duha ug tonga ka tuig niini sa kapitolyo. Gani, buot sa gobernador nga magbuslot ug magsemento og dalan gikan sa kabukiran sa Misamis Oriental pasulod sa dakbayan sa Iligan ug Cagayan de Oro, arun adunay laing dalan nga maagian kung ugaling adunay mga kalamidad nga mohapak sa dili matagna nga panahon.

“Hinay-hinayon naku og semento ang tanan dalan lahos paingon sa bukid, tungod kay karong sunod nga CMGP, ang akong plano sa CMGP buslotan naku ang dalan lahos dadto sa Cagayan. Sumpay dayon sa Libertad-Tangcub-Lapad paingon sa Iligan. Kung seguridad lang ang hisgutan, simbako usa lang ka tulay dinhi sa highway, bombahan…bisan dili bomba simbako dunay kusog kaayo nga bagyo asa man mangagi? Mao na akong gusto simentuhon,” sulti ni Gobernador Bambi sa iyang mensahe atol sa gipahigayon nga groundbreaking.

Mokabat man sa lima ka bulan una pa mahuman ang proyekto, apan matud sa mga molupyo sa lugar, mas maayo na lang gani kay natagaan og higayon ni Gobernador Bambi Emano ang pagtubag sa ilang dugay nang pangandoy sukad pa sa milabay nga administrasyon.