Plano karon sa pangagamhanang lokal sa Misamis Oriental nga paliton sa mas taas nga presyo ang kilo sa abot nga humay sa atong kaigsuonang mag-uuma dinhi sa lalawigan. Kung P18.00 matag kilo ang palit sa ilang naandang komprador, himuon kining P20 ang matag kilo aron mas modaku pa ang kita sa atong mag-uuma sa probinsiya ug mas madasig pa sila sa pag-uma.
Nunot niini, gihangyo ni Gobernador Bambi Emano ang mga miyembro sa Sangguniang Panlalawigan nga magpasar og resolusyon kabahin niini nga plano aron magahinan sa pundo, yawat na lang mahagkapan sa bug-at nga galastuhan ang mag-uuma sa ilang tanom.
Kaabag ang Provincial Agriculture Office ug Department of Agriculture, walay imposible kon dunay bayanihan sa lokal nga pangagamhanan ug ang kinabag-an.
Saludo si Ms. Carlota Madriaga sa plano sa gobernador. Niya pa, wala pa siya sukad makadungog sa susamang plano ni Gobernador Emano aron lamang madasig pa sa pagtanom sa humay ang atong kaigsuonang mag-uuma nga nag-ilaid intawon sa barato nga palit sa ilang abot.
Walay laing tumong ug tinguha si Gobernador Bambi Emano sa iyang pagpalambo sa industriya sa agrikultura, hilabina nagtuo kini nga kon walay nagtanom, walay maani ug makaon sa katawhan. Apan buot usab sa gobernador nga dili maalaut ang atong kaigsuonang mag-uuma, gihatagan niya kini og pabor, pabor nga mahimong pabor usab sa konsumante sa Misamis Oriental ug dakbayan sa Cagayan de Oro.