ARON pormal nga isaulog ang pag-abli sa Bulan sa Kooperatiba, ang Kapitolyo Probinsyal sa Misamis Oriental gipaluyohan sa walay puas nga suporta ni Gobernador Bambi Emano uban sa pagpangulo sa Provincial Cooperative Office pinangunahan Mr. Alberto B. Acain niduyog sa gipahigayong motorkada adlawng Huwebes, Oktubre 1, 2020.

Miuban sab sa motorkada ang kinatibuk-ang pwersa sa Provincial Capitol Employees Multipurpose Cooperative (PCEMCO) nga gipangulohan ni Chairman Andrew Gapus inubanan ni Manager Fleurdeliz P. Tabamo.

Ang mga kalihukan sa bulan sa kooperatiba inisyatiba sa Regional Cooperative Development Council-X ug sa Cooperative Development Authority-X.

Adunay 21 ka partisipante nga misunod sa mga health protocols ang miduyog sa motorkada ug nagkalain-laing kooperatiba sab ang misuporta aron itanyag ang panaghiusa ug kadasig sa ilahang sektor alayon sa tema: “Cooperatives, amidst the pandemic, stand for resiliency, strive for sustainability”

Human sa motorkada usa dayon ka virtual opening sa selebrasyon nga gitambungan sa 110 ka mga partisipante gikan nagkadaiyang kooperatiba sulod sa Rehiyon Diyes.

Duyog sa selebrasyon nagpadangat si Gobernador Bambi sa iyang mensahe nga unta ang mga kooperatiba magmalig-on sa ilang misyon nga hingusgan ang panginabuhian sa ilahang mga miyembro hilabina karon anaa kining hagit hatud sa pandemya.