SAYOD ang tanan nga kinahanglan maaprubahan una ang budget sa matag lungsod, siyudad ug probinsiya, ayha pa dayon makapatuman sa programa’g proyekto sa katawhan sa kadaplinan ug kabukiran. Apan kon dunay magbabalaud susama sa bise gobernador nga nagpugong nga maaprubahan kini, luoy ang kabus nga naghulat sa libreng serbisyo alang kanila, kay sigurado mapihig man gayud sila.

Bisan si Misamis Oriental Provincial Treasurer Mr. Ronald Jame Violon nakasulti dili sapian o adunahan ang makabenepisyo sa aprubadong budget kon dili mga kabus ug pit-os sa panalapi, tungod kay sagad nga programa ni Gobernador Bambi Emano pulos libre aron sa pagtubag sa ilang suliran.

“Kung enkaso dili nato mapatuman ang mga programa og proyekto, ilabina sa atong governor, kibale ang katawhan sa Misamis Oriental ma deprived sila sa benipisyo nga mahatag diha kanila,” matud pa ni Mr. Violon.

Dugang pasabot ni Mr. Violon, tanang disbursement moagi sa iyang opisina, susama sa hinabang sa nagsakit, na-ospital, namatyan; pundo sa pagpatuman sa proyektong imprustruktura, agrikultura, kooperatiba, edukasyon, kinaiyahan, transportasyon, kahusay ug kalinaw ug daghan pang uban.

Walay salakyan nga modagan kon walay gasoline. Walay telebisyon nga mo-andar kon walay kuryente. Samtang, walay gobyerno nga mapadagan kon walay pundo. Simple ra kaayo nga panag-ingnan, apan lisud sabton sa bise gobernador kon ngano hangtud karon dili pa niya gusto maaprubahan ang 2020 budget alang sa probinsiya.