SUGOD sa adlaw nga Lunes, Oktubre 5, 2020 nagbukas na ang klase sa nasud ug dinhi sa lalawigan sa Misamis Oriental adunay 472 ka mga tunghaan ang gibuksan nga gilangkoban sa Elementarya, High School ug mga Community Colleges sa tibouk lalawigan sa Misamis Oriental.

Nasayod si Governor Bambi Emano sa mga pagsulay nga dala sa pagbalik sa mga estudyante sa ilang mga tunghaan lakip na niini ang dako nga risgo nga mataptan sa Corona Virus Disease (Covid-19) ug pagsaka sa kaso.
Sa pagbukas sa klase adunay gipaagi sa modular class ug online class ug matud ni Gov. Bambi nga kon dili magma-ampingon basin unya magkadaghan ang matala nga mga kaso sa Covid-19.

Tungod niini, gihangyo niini ang mga ginikanan, mga magtutudlo, mga estudyante ug ang mga Local Government Unit (LGU) nga tabangan ang kagamhanan pinaagi sa insakto nga kooperasyon sama sa pagsunod sa mga gihangyo ug gimando nga mga gabayan aron makalikay sa virus.

Dako ang pagdayeg ni Gov. Bambi sa mga teaching ug non-teaching nga mga personahe sa Department of Education (DepEd) gumikan sa pagpadayun sa ilang kadasig sa pag-abri gihapon sa mga tunghaan taliwala sa pandemya.