Dili na mo-settle pa sa ginagmay nga negosyo, kinahanglan ang matag kooperatiba mosulod na sa mga dinagko nga negosyo aron mas daku usab ang ilang mahimong kinitaan.

Kini ang dakung hagit ni Gobernador Bambi Emano ngadto sa tanang aktibong kooperatiba karon dinhi sa Misamis Oriental ug dakbayan sa Cagayan de Oro, lakip na usab ang ilang mga miyembro, kung diin andam ang pamunuang Emano nga mopaluyo ug mosuporta sa ilang sudlang dakung negosyo.

Saad sa gobernador nga andam siyang motabang kung hisgotan ang pundo ug technical assistance ngadto sa mga kooperatiba nga buot mosulod sa mas challenging nga negosyo. Gani, dakung pasalamat sa amahan sa lalawigan nga kanunay nagpaluyo sa iyang administrasyon ang Cooperative Development Authority (CDA) sa matag kalihukan nga malambigit ang cooperative sector.

“Before my term ends, sa dili pa matibawas akong termino sulod sa siyam ka tuig, unta magbuhat ta og plano—plano nga dinagko pud. Bisan magpili ta og tulo ka dagko nga kooperatiba nga akong tabangan. Minimum ta og P500 to P1 million, katong gusto bitaw nga makita nato nga dili taphaw bitaw. Capital lang na, walay labot building,” ingon pa sa Gobernador.