NAKIGPULONG ang mga Korean investors kang Gobernador Bambi Emano niadtong Nobyembre 12, 2019, sa katuyoan nga mohanyag sa ilang intensiyon nga mobubo og negosyo dinhi sa Misamis Oriental, laing planta na usab ang lauman nga matukod dinhi sa lalawigan.

Si Dr. Jun Myung Ha, usa ka specialist sa immune system ug bacteria sa nasud sa Korea, uban sa iyang kapikas, si Baek Heui Sook; ug mga kaubang investors Han Myung Soo ug Jung Young Kyui mihanyag nga magtukod og factory sa cosmetics products, tambal ug juice nga gama sa lubi ug berries.

Sa ilang pakigpulong kang Gobernador Bambi, sila nagkanayon nga daku ang ilang pagtuo ug pagsalig sa kasamtangang pamunuan nga dili sila pasagdan o ba kaha kilkilan susama sa gibuhat sa mga kaatbang sa pulitika sa gobernador, hinungdan sa ilang pagsalig nga dili gayud masayang ang ilang puhunan, inay molambo pa kini sa umalabot nga mga panahon.

Butyag usab sa grupo nga buot nilang motabang sa administrasyon ni Gobernador Emano sa lakat sa agrikultura inabagan sa Department of Trade and Industry (DTI) pinaagi sa coco coir factory, food innovation center, ug uban pa.

Tungod niini, hilabina dugang ekonomikanhong kalihukan na usab kini dinhi sa Misamis Oriental, gimanduan ni Gobernador Bambi Emano ang iyang mga ulo sa departamento sa kapitolyo nga makig-alayon sa mga Korean investors, hilabina ang pag-uban kanila suroy sa nagkadaiyang agricultural tourism sites aron mas maaghat pa ang mamumuhunan nga mobubo og negosyo dinhi sa lalawigan.