KINI na ang ika-6 nga tuig alang sa Kuyamis Festival dinhi sa Misamis Oriental sukad kini namugna niadtong tuig 2013. Maoy pinaka gikahinaman sa tanang Misamisnon matag sulod sa bag-ong tuig.
Si Gobernador Bambi Emano, kauban si Board Member ug kandidato bise gobernador Prexy Elipe maoy nangulo sa pagbukas sa Kuyamis Festival 2019 kagahapong adlawa, Enero 7. Molungtad ang maong tinuig nga kasaulogan hangtud Enero 13, 2019.
Ang Provincial Tourism Department, sa pagpangulo ni Atty. Jeffrey Saclot, maoy nangulo sa pagpatigayon sa nasangpit nga kasaulogan ning tuig, sa paningkamot nga mamahimong siksik gayud sa kalingawan ang maong silibrasyon kauban ang turistang lokal ug langyaw.
Dunay cultural presentations matag gabii gikan sa 23 ka lungsod ug duha ka dakbayan ang ipahigayon; booth competition, booth display competition, Farmers’ Market, showdowns, indigenous peoples’ skills competition, cultural music concerts, culture and arts exhibits, horse show. Apan ang labing gikahinaman mao ang Search for Miss Kuyamis 2019 nga gi-representahan sa 20 ka maanyag, malantip og salabotan ug talentadong mga dalaga.
Gi-aghat ni Gobernador Bambi Emano ang tanan sa pagsaksi ning maanindot, masadyahon ug mabulokong kalihukan.
Ang Kuyamis Festival gimugna ni Gobernador Bambi Emano sa unang tuig niini pagpungko sa kapitolyo, sa paningkamot nga mapaila ug madala ang Misamis Oriental ug tanan niining hiyas ngadto dili lamang sa tibuok Pilipinas, apan sa tibuok kalibotan.
Sukad tuig 2013, ang ihap sa mga turista milubo na ngadto sa 50 milyones, maoy hinungdan sa pagdaghan sa oportunidad sa trabaho, negosyo ug kapangitaan alang sa tanan.
Daghan niadto ang nagsulti nga dili kini mahimo ni Gobernador Bambi. Apan karon, ang katawhan nagmaya tungod kay ang paningkamot nga mapalambo ang turismo maoy dakung kontribusyon sa pagkunhod sa ihap sa kapobrehon sa lalawigan—gikan 1 porsiyento sa tuig 2017, padulong sa 9 porsiyento sa tuig 2018.
“Kining talagsaong pagkunhod sa poverty incidence, nagpasabot nga sa dul-an 900,000 nga populasyon sa Misamis Oriental, duna nay 9,000 ka tawo ug pamilya nga makakaon na katulo sa usa ka adlaw ug kaya nang maghatud sa ilang mga anak ngadot sa koliheyo. Kini, dili tungod kang Bambi Emano, kon dili tungod sa hiniusang paningkamot sa pangagamhanang lokal, Sangguniang Panlalawigan, mga ulo sa departamento sa kapitolyo, mga empleyado, kapulisan, kasundalohan, nasudnong kagamhanan ug ahensiya, ug labaw sa tanan, ang katawhan tungod sa ilang walay hunong nga pagpakabana sa kahimtang sa lalawigan,” luwat pa ni Gobernador Bambi Emano sa iyang mga pakigpulong sulod man o gawas sa Misamis Oriental.