NIADTONG adlaw nga Huwebes, Oktubre 1, nagsugod sa pagpahigayon og “site validation” ang buhatan sa Provincial Veterinary Office (PVET) sa pagpanguna ni Dr. Benjamin Resma.

Kini uban sa koordinasyon sa Philippine Rural Development Project- Regional Project Coordinating Office (PRDP RPCO) , Provincial Project Management and Implementing Unit Special Team ngadto sa mga lugar nga posibleng tukoran sa Triple ‘A’ Slaughterhouse Facility sa Probinsya.

Ang gitakdang pasilidad nga pagatukoron laumang adunay kadak-on nga sobra sa 5,000 square meter ug kung mahatagan og katumanan kining maong proyekto mao sab kini ang pinakauna nga Triple “A” Slaughterhouse Facility sa intero Rehiyon Diyes ug kini pagapondohan sa PRDP nga gikan sa Worldbank.

Laraw sa pamunoan ni Governor Bambi Emano pinaagi sa kadasig ug maabtikong lakang ni Dr. Resma sa PVET nga dili lang mga gagmayng hog-raiser ang makabenipisyo niini apan lakip sab kadtong mga “large scale” hog-raisers tungod kay ang mga karne nga nagikan sa maong pasilidad mamahimong ma-export sa laing lugar.