NAGMALAMPUSON ang gipahigayong paglusad sa implementasyon sa Public Utility Vehicle Modernization Program dinhi sa Misamis Oriental ug Cagayan de Oro, Marso 6, 2020, nga gipahigayon sa hawanan sa kapitolyo.

Unang nagpahigayon sa press conference si Gobernador Bambi Emano, Cong. Rufus Rodriguez, LTO-10 Dir. Nelson Manaloto, LTFRB-10 Dir. Aminoden Guro, LTFRB-Central Office Technical Division chief Dir. Joel Bolano, ug LTFRB-Central Office Franchise Planning Divison chief Dir. Mario Tuzcan Naz, kauban ang mga miyembro sa prensa gikan sa Misamis Oriental ug Cagayan de Oro.

Human niini, ang ribbon cutting ceremony sa 15 ka public utility bus sa Rural Transit Mindanao, Inc; 15 ka mini-bus sa Donsal’s Express, Inc; ug 75 ka taxi units sa New Mindanao Transport Service Cooperative (NEMINTSCO) nga andam nang moserbisyo sa publiko sugod sa maong adlaw. Ilang rota, gikan sa Misamis Oriental padulong sa dakbayan sa Cagayan de Oro.

Misaksi sa okasyon sila si Board Members Dexter Yasay, Saysay Emano, Nancy Madjos, Leonard Winstanley, Erik Khu; mga ulo sa departamento sa Kapitolyo Probinsyal; representante sa transport cooperatives; ug mga kawani sa kapitolyo.

Hilabihan ka sadya ang nasangpit nga okasyon, kung diin nahimong landmark ang kapitolyo sa pagsugod sa operasyon sa nasangpit nga mga modernized public utility units dinhi sa Misamis Oriental ug Cagayan de Oro.