NAGTUNOL ang panggamhanang lokal sa Misamis Oriental ug hinabang ngadto sa Lungsod sa Naawan human adunay nag positibo sa COVID-19 sa maong lungsod.
Pinaagi sa buhatan sa Provincial Social Welfare and Development Office kon PSWDO, gitunol kagahapong adlawa, Hulyo 16, 2020 ang 500 ka food packs sa Municipal Social Welfare and Development Office kon MSWD nga gidawat ni SB Member Kag. Allan B. Roa nga maoy nagsilbing acting municipal Vice Mayor karung panahuna.
Matud ni Kag. Roa laumang ipang apod-apod ang maong ayuda sa mga apektadong residente hilabi na sa barangay nga mas naapektohan tungod sa maong pandemya.
“Dako kaayo ang kalipay nako nga naa kining mga ayuda nga gihatag ni Gobernador Bambi Emano kay sa tinuod lang kung kami lang sa local nga pangagamhanan tungod kay niadtong miaging mga bulan dako na kayo kita ug gasto nga gipanghatag nga ayuda sa mga katawhan, medyo kulang na gyud ang atoang pundo,” matud sa bise-mayor.
Dugang niini nga dako kaayo iyang pasalamat kang Gobernador Bambi sa hugot nga suporta niini sa lungsod aron mas maproteksyunan ang katawhan batok sa Covid-19.
“Dako kaayo among pasalamat kang Gobernador Bambi sa ayuda nga iyang gihatag para sa atoang mga affected nga mga zonal contain nga mga areas so daghan kaayong salamat Governor,” matud niini.
Mapasalamaton usab si Roa ngadto kang Provincial Task force for COVID-19 Chief Dr. Jerie Calingasan tungod kay wala kini sila pasagdi sa pagsugod pa lang nga aduna nay nag positibo sa lungsod.
Paspas ang mga kamandoan niini ngadto sa PSWDO nga deretso gilayon ihatag ang hinabang ngadto sa mga naapektuhan.