NAKIGDUYOG ang Kapitolyo Probinsyal ubos sa pamunoan ni Governor Bambi Emano sa selebrasyon sa National Council on Disability Affairs sa ika-42 nga pagsaulog sa National Disability Prevention and Rehabilitation Week 2020.
Ang tema karong tuiga mao ang: “Hiniusang pagpakita na ang katungod sa kabataan, kababayen-an, ug sa mga hamtong nga adunay mga kabilinggan nga mahatagan sa pagkaon, medisina ug mga kagamitang makagaan sa ilang kabilinggan maoy importante kanato; kini gipasiuna labi na niining panahon sa COVID-19 pandemya.”
Subay sa tema ug programa, si Governor Bambi pinaagi sa buhatan sa Provincial Social Welfare and Development Office (PSWDO) nga giulohan ni Mr. Jhunleymar Abella gitakdang manghatag og livelihood financial assistance sa 15,351 ka mga PWD sa Misamis Oriental.
Ang maong financial assistance nagtumong nga matabangan nga mapalambo ang mga nagkalain-laing grupo sa mga PWD labina sa ilang mga negosyo ug panginabuhian.
Nasayod si Gov. Bambi nga karong panahon sa pandemya, usa sa mga labing naapektuhan ang mga PWD hinungdan gipangandaman sa lalawigan nga sila mahatagan gyud og livelihood financial assistance.
Taliwala sa mga nagkalain-laing problema na giatubang karon sa lalawigan wala gikalimtan sa amahan sa lalawigan ug gibati pag-ayo ang mga panginahanglan sa PWD ug gani lakip kini sila kanunay sa iyang mga plano.