UNANG Lunes, petsa dos sa Marso 2020, hilabihan ka bibo ang kapitolyo. Gawas nga regular flag-raising ceremony kini sa mga empleyado, mao usab ang pagbukas sa usa ka bulan nga silibrasyon sa Women’s Month nga gihataga’g dakung bili ni Gobernador Bambi Emano.

Walay naulahi, babaye’g lalaki, bisan pulos tuo ang tiil, hala sayaw sa version sa Tala dance ni Sarah Geronimo isip halad ngadto sa kababayen-an dili lamang mga kawani sa kapitolyo, apan lakip na ang ilang mga ginikanan ug mga kaliwat nga babaye.

Sa walay sipyat, gihimo gayud kining “very important month” ni Gobernador Emano alang sa tanang kababayen-an sa tibuok Misamis Oriental ug Cagayan de Oro, tungod kay nagtuo kini nga angay pasidunggan ug pasalamatan ang kababayen-an nga nagluwa kanato dinhi sa kalibotan.

“First, let me tell you I always respect women, because every time I look at you, I always see my mother. Never forgot and will never be forgotten that my mom ang akong inahan gisabak ko niya siyam ka bulan sa iyang tiyan,” tipik sa mensahe ni Gobernador Emano ngadto’s kababayen-an samtang nagsaad kini og gamay’ng pahalipay ug kalipay ngadto kanila.

Didto mitambong ang MisOr beauty queens nga sila Isobel June Teano, Chella Grace Falconer, Berjayneth Chee; lakip sila Board Member Dexter Yasay, Saysay Emano, Wayne Militante, Fredrick Khu, Gerardo Sabal, Nancy Madjos, Leonard Winstanley, Mitchele Anayron, Kerwin Jess Soldevilla ug Allan Mandokita.

Miduyog usab sa kasadya sila si DILG MisOr Provincial Director Engr. Marisia Naybe ug Misamis Oriental Provincial Fire Marshal Supt. Gregorio Elbambo.

Mao ra’g One-Billion-Rising event ang nahitabo niadtong adlawa sa kapitolyo, kung diin suportado gayud kaayo sa tanang kalalaken-an sa kapitolyo. Matud sa mga empleyado, karon pa gayud intawon sila nakasinati og susama niini sukad sila nanerbisyo sa kapitolyo probinsiyal sa Misamis Oriental, tungod sa hibug-aton nga gihatag ni Gobernador Bambi Emano kanila nga giisip niining mga ginikanan ug igsuon.