ATOL sa senimana ug virtual nga pagpakayab sa nasudnong bandila sa kapitolyo probinsyal adlawng Lunes, Hulyo 20, 2020 iyang gipaabot ni Dr. Jerie Calingasan, ang chief sa Provincial Task Force for Covid-19 nga dili angayan balewalaon sa katawhan sa lalawigan ug mga empleyado sa kapitolyo ang mga nahibaloan sa pagpakigbatok sa makapatay nga Corona Virus Disease (Covid-19).
Pasabot niini nga ang pag-paminaw sa matag semana nga virtual flagraising sa pangagamhanang lokal sa Misamis Oriental daku usab og pagtulun-an ug dugang kahibalo sa nasinati karon nga pandemya.
Matud ni Dr. Jerie nga kanunay niya nga gaibalik-balik kung unsa ang Covid-19 ug unsa ang epekto niini kung mataptan sa virus ug labaw sa tanan sa matag adlawng Lunes walay puas ang iyang pahimangno sa unsay angayan buhaton aron malikayan ang maong sakit.
Malaumon kini nga dili balewalaon ang iyang mga pahimangno ug protektahan ang tagsa-tagsa ka mga kaugalingon labina nga ang lalawigan sa uwahing tala misaka na ang ihap sa nataptan ngadto sa 35.
Ug taliwala paman nga sagad kanila mga Locally Stranded Individual ug Returnong Overseas Filipino Workers dili gihapon angayan nga kumpiyansahan.
Pahimangno ni Dr. Calingasan nga kanunay nga sundon ang mga gabayan ug mahimong ehemplo ngadto sa uban.
Sa iyang bahin, si Gobernador Bambi Emano nasabtan ug maayo ang kabalaka ni Dr. Calingasan hinungdan nihangyo kini sa katawhan labina sa mga empleyado nga mahimong ehemplo ug lakip nga maningkamot sa pakigbatok sa Covid.
Dugang sa gobernador nga himoun ang kaugalingon nga ehemplo pananglitan kung naay makita nga wala nag sul-ob og mask.
“Kamo na ang mosulti nga magsul-ob siya, kung naa moy nakita nga wala nag obserbar sa social distancing, kamo na ang mobadlong,” matud ni Governor Bambi.
Gamay lamang kaayo kini nga butang kon itandi sa problema ug kabalaka nga gibati karon ni Dr. Jerie Calingasan ug malaumon kini nga ang mga empleyado mokooperar kay gikinahanglan sa lalawigan ang pagtinabanga sa pakigbatok sa makapatay nga virus.