Wala pakyasa ni Gobernador Bambi Emano ang pagtambong sa ika-48 nga panagtigum sa MORESCO 1, atol sa ilang ika-50 nga anibersaryo ug Annual General Membership Assembly nga adunay tema: “Better, Brighter, Stronger! Gipahigayon kini sa lungsod sa Laguindingan, niadtong adlaw nga Biernes, Mayo 18, ning tuiga.

Isip usa sa nahimong mamumulong, gisaysay ni Gob. Emano ang mga nagkadaiyang kalambuan kung hisgutan ang kooperatiba sa lalawigan sa Misamis Oriental sama sa Itikan sa Kalambuan o Duck Raising program, diin sa pagkakaron, nahimu na kitang top producer sa Mindanao sa produkto nga balut. Kini nakahatag ug dugang panginabuhian sa atong mga mag-uuma aron sila makatabang sa ilang pamilya pinaagi niini nga programa.

“Samtang ako pa ang gobernador sa lalawigan sa Misamis Oriental, paningkamotan nako nga makunhuran ang kapobrehon sa atong mga kaigsoonan nga nag ilaid sa kalisud, busa namugna ang nagkadaiyang programang kalambuan aron matagtaman nila ang kaharuhay sa kinabuhi,” sulti pa ni Gobernador Bambi.

Gidayeg ni Mr. Edgardo R. Masongsong, Administrator sa NEA kon National Electrification Administration ang pamunuan ni Gob. Bambi Emano sa lalawigan kinsa siya nahimong instrumento aron mahimong magmalumpuson ang pag serbisyo sa MORESCO 1.

Kahinumduman nga usa sa duha ka pioneering nga Electric Cooperative sa Pilipinas ang MORESCO 1, nga gi organisa niadtong 1968 diin aduna lamang 100 ka miyembro.

By: PIO/MB