TANANG interesado nga molukat sa ilang passport sa mas hamugaway nga paagi, mahimong mosalmot sa programang Passport on Wheels sa Department of Foreign Affairs (DFA) karong umalabot Agosto 27-29, 2019, sa kapitolyo.

Matud ni Gobernador Bambi Emano, walay pili, basta interesado nga molupyo sa Misamis Oriental ug Cagayan de Oro, mahimong mosalmot niini nga programa.

Dugang sa gobernador, dakung tabang kini ngadto sa atong kaigsuonang walay igong panahon nga maglinya sa buhatan sa DFA alang lamang sa paglukat sa maong dokumento nga maggamit panahon nga ila kining gikinahanglan sa pag-abroad, manarbaho man o mahimong turista sa nagkadaiyang nasud sa tibuok kalibotan.

Pahinumdum lamang sa tanan, kinahanglan magdala nang daan sa P1,200 alang sa processing fee, ug laing P150 alang sa balayrunon sa courier company nga maoy maghatud sa dokumento sa ilang tagsa-tagsa ka tugkaran kon ugaling aprubado na sila sa DFA. Dugang niini nga rekisitos ang authenticated birth certificate ug marriage certificate gikan sa Philippine Statistics Authority (PSA) ug identification card (ID) nga ilang dalhon atol sa pagpahigayon sa maong programa. Ug, kinahanglan isa pa lang ka bulan una pa ang adlaw sa pagpahigayon sa programa, nakapalista na sa buhatan sa Public Employment Services Office (PESO) sa kapitolyo sa Misamis Oriental.

Dakung pasalamat ni Gobernador Bambi Emano ngadto sa DFA sa pagtubag sa iyang hangyo nga adunay ipahigayon nga Passport on Wheels activity sa kapitolyo, hilabina daghang nagkinahanglan niini nga walay igong panahon ug oras nga makalukat pinaagi sa paglinya sa DFA.