Nasakmit sa Misamis Oriental ang gikahinamang ATOP (Association of Tourism Officers of the Philippines) Pearl Awards isip First Runner-Up 2019 Best Tourism Oriented Province (LGU Award) sa tibuok nasud sa Pilipinas ubos sa Province Category, niadtong Oktubre 4, 2019 atol sa ika-20 nga kasaulogan sa ATOP National Convention sa Ilocos Norte.
Usa ka garbo kini nga sulod sa 81 ka mga lalawigan sa Pilipinas, mi-top ang Misamis Oriental hangtud sa pagpili sa Top 4 kauban ang mga lalawigan sa Ilocos Norte, Samar, ug Quirino.

Kini nga kadaugan usa ka highly regarded distinction alang sa tanang lalawigan nga mipakita ug dili tiaw nga paningkamot aron sa pagkab-ot ug laing hugna na usab nga kalamposan.

Pormal nga gi-anunsyo sa kadaghanan ang nasangpit nga prestihiyosong award atol sa Flag Raising ceremony, adlawng Lunes- Oktubre 7, 2019 kung asa bitbit nila Gobernador Bambi Emano ug Atty. Jeffrey Saclot ang bililhon nga Plaque of Recognition ug giplantada atubangan sa stage.

Dili malalis nga makadaug ang MisOr tungod sa mga programa ubos sa liderato ni Gob. Bambi Emano nga ang kinabag-an o mga Misamisnon naka-benepisyo niini, hilabina nga Turismo ang flagship program kung asa paspas kaayo ang pag-uswag dinuyugan sa pag-padayon ug implement sa nagkalain-laing livelihood projects lakip na ang stable state sa peace and order ning lalawigan, ug miresulta sa taas nga business investments.

Damgo gayud ni Gobernador Bambi Emano nga mamahimong major tourist destination ang lalawigan sa Misamis Oriental sa tibuok nasud sa Pilipinas. Ug sa makanunayon dili mawala ang suporta ni Provincial Tourism Officer Atty. Jeffrey Saclot nga panguluhan ang pag-ugmad sa malamboong turismo ning lalawigan.