GISUGDAN na ang pagpagwapo sa Flight 387 Shrine nga sa umaabot mahimo na nga Misamis Oriental Botanical Garden and Agricultural Tourism Complex nga mahimutang sa boundary nga bahin sa lungsod sa Claveria ug siyudad sa Gingoog.
Matud ni Governor Bambi Emano atol sa Lambo Radyo Program adlawng Miyerkules, Agusto 5, 2020 nga niaging mga bulan pa unta kini nga gisugdan apan nalangan human suspendido ang mga konstruksyon gumikan sa Corona Virus Disease (Covid-19).
Ang team sa Provincial Engineering Office (PEO) mihidangat na maong shrine arun sugdan na ang rehabilitasyon niini ngadto sa Agricultural Tourism Complex.
Dako og tabang sa pagpatukod ang kamanduan sa Department of Energy Act of 1992 nga tanang power generating companies muhatag sa 0.01 centavo sa ilang kinitaan ngadto sa barangay, lungsod o lalawigan kong hain sila nahimutang kon diin sa maong kinitaan mao sab ang ilang gitunol sa lalawigan sa Misamis Oriental.
Sa kasamtangan mamatikdan na ang mga dagkong trapal sa palibot ug gidid-an na nga pasudlan og mga mobisita kay kasamtangan na gisugdan ang katukoran niini.
Matud ni Governor Bambi nga perpekto ang Shrine nga pagwapuhon ug himoung Agricultural Tourism Complex gumikan sa ka nindot sa klima sa lugar, daplin usab sa highway ug gawas pa nga diri gahandumon sa lalawigan matag bulan sa Pebrero ang pagkahagsa sa Cebu Pacific Flight 387.