SUBLING Giaghat ni Engr. Presco Valmoria ang mga lideres ug katawhan sa Misamis Oriental ug Cagayan de Oro nga magkolekta’g plastic waste materials aron mahimong bangko kon plastic armchairs nga maggamit sa mga tulunghaan nga nagkinahanglan pa niini.

Pinaagi sa Sipag Villar Foundation, didto dalhon ang makolektang plastic waste materials sa Lumbia, Cagayan de Oro, kung diin nahimutang ang processor nga mag-recycle sa nasangpit nga plastic nga basura.

Gani, niadtong Lunes, Enero 27, 2020, laing 100 ka armchairs ang gi turn-over ngadto sa lungsod sa Opol ug Medina gikan sa nakolektang plastic waste materials sa katawhan sa nasangpit nga mga lungsod.

Suportado ni Gobernador Bambi Emano ang panawagan sa Provincial Environment and Natural Resources Office sa publiko, ug, nanghinaut nga unta motamod ang katawhan total para ra man gihapon kini sa kaayohan sa kasamtangang henerasyon ug sa umalabot.